حبايبي الحلوين ،اهلا بيكم في برنامجكم الحبوب(اتفرج ع الحلاوة)والمقرر تشاهدوا فقراته ليل نهار واي حد مش عاجبه يورينا نفسه!!ه
النهاردة يا اطفال عندنا فقرات كتيرة ومتنوعة وعايزين نبدأ بأول واهم فقرات الحلقة كلها
الحكاية بتحكي عن حاجة بسيطة وعسولة خالص ويا ريت نسمعها كلنا عشان نتعلم منها ازاي نعيش اقل من البهايم كما هو مقرر لكم علي ارض هذا الوطن
طبعا يا اطفال انتو ملاحظين ان الدنيا حواليكو زحمة جدا والزبالة والتراب يخنقوا وكمان الاكل مش نضيف حتي لو افترضنا انه من مصدر معروف وصالح للاكل
وطبعا يا حبايبي لو قعدنا نتكلم عن الاسباب اللي خلت الحال يوصل لكده مش هنخلص وكان الاحسن لنا اننا نتكلم عن الحلول اللي قدامنا عشان نحل بيها المشاكل دي كلها خصوصا ان التلوث والزحمة قربوا يقضوا عليكم
وكان الحل الاوحد للموضوع ده ان العدد الكبير يتوزع علي الارض الكتير ،والحمد لله مصر مليانة اراضي فاضية كتير لكن للاسف طلع ان الصحرا خلصت !!ه
اه والله خلصت واللي مش مصدقني يتفضل ينزل يشتري ارض في اي حتة جنب القاهرة او الاسكندرية وهيلاقي الاراضي اللي هناك اتباعت اما لشركات كبيرة واجنبية هتبنيها للاغنياء
او اتباعت لشركات مقاولات هتبني وحدات سكنية ممتازة لا تناسب اسعارها الا الاغنياء برضه
او لافراد ودي محتاجة تفصيل شوية -والاطفال الصحفيين يطرطأوا ودانهم معانا شوية،ه
الموضوع بسيط وسهل ،مجرد ان سعادتك تلم عشرة خمستاشر فرد من عيلتك او من جيرانك وتأسسوا جمعية اهلية تشهر في الشئون الاجتماعية وطبعا العسل بيلم الدبان
هتلاقي مسؤلين كتير كتير في وزارة التضامن او وزارة الاسكان هيقولوا لك تعالي انت بس واحنا عندنا اللي هيخصص لك الارض مادام نسبته طبعا محفوظة
وطبعا سيادتك ناصح وما دام كده كده الارض متخصصه فخد مثلا100فدان بسعر المتر5جنيه وسجلها وبعدين ابدأ تقسيمها وبيعهاالقريب
من الطريق مثلاب100جنيهواللي بعيد يا سيدي خليه ب40بس
من الطريق مثلاب100جنيهواللي بعيد يا سيدي خليه ب40بس
وطبعا يا اطفال لما نبص للسلسلة من البيع المتكرر وصولا لمشتري يادوب عاوز يشتري مساحة لشقة وهيبني علي المساحة كلها طبعا،يعني من الاخر احياء عشوائية جديدة اتأسست علي الفساد القذر ولا ينتظر منها طرح اي انفراج لازمة العشوائية الاصلية بل بالعكس دي هتضيف لها
وبالطبع يا اطفال الموضوع ده علي عينك يا تاجر واللي عاوز يتأكد يكلف نفسه ويسأل بس
حبايبي الحلوين
بالشفا
19 comments:
طبعا دى اول فصل من الحدوته وحل بسيط لازمه الزحمه مش كده برضه .... طيب احنا منتظين بقيه الحلول بس بالراحه علينا شويه انت عارف اننا اطفال حلوين واستيعابنا بطىء .... وبعدين علشان نعلم بالنصيحه اللى فى نهايه الحدوته الاولى ... ولا ايه ....
وبعدين فين القفله المعهوده بتاعه حلوة ولا ملتوته
هيا اكيد حلوة قوى
ومنتظرين بقيه الحواديت ....مولااااااااااااااى
كوكو كوكوووووووووووووووووو
ما اقسى هذا البرنامج على اسماعنا قبل سماع الاطفال
طبعا احنامش محتاجين نتأكد اصل الريحة النجسة ظاهرة في كل مكان
سؤال وعايزك تجاوبني عليه
الناس دي عندها كتير بس الغريب كل لما بياخدوا اكتر بيتسرعوا اكتر تفتكر اصبح مرض ولاعادة ولاايه ؟
ابناء صاحبة الجلالة:متهيألي الموضوع ده المفروض هنسمع تفاصيل اكتر عليه منكم ..ده اذا كان لسه الصولجان في ايدين صاحبة الجلالة فعلا
موناليزا:متهيألي القسوة تزيد اذا درتي في الاحياء العشوائية التي تملأ البلد واخذتي تعزي نفسك باحلام مستقبلية تري فيها مساكن مخططة نظيفة ثم تفاجأي بان الحلم ايضا ليس من حقك وان حياتك الوحيدة التي ستححيينها ستكون جبرا بين الزبالة والقبح والتراب والزحام
مصطفي العزيز:حد يلاقي جراب مفتوح ولا يمدش ايده..وبعدين لعلمك حالة عدم الامان للمستقبل تشمل الكل ..تجعل الفقير يتمني اي مخرج وتجعل الغني ينهب اكثر
مصطفي :ه
انا احب احييك علي تعليقك في تدوينة هذا انا فانت اول من اقترب من المعلقين للفكرة الاساسية ودة اسعدني جدا
الله ينور عليك ايه الأسلوب الجديد ده بس الحكاية دي ممكن تتحكي للأطفال الذين يعانون من كثرة النوم وعموما يا عم مش الأراضي الجديده بس اللي بيجري فيها كده او بتتعرض للعشوائيه او عملية نقل للعشوائيات من الداخل الي الخارج ولكن هذا لا ينبغي ان ياخذ من عنايتنا بتطوير العشوائيات داخل القاهرة اذ انها ايضا يحدث فيها العديد من المهازل فبالرغم من ان هناك العديد من المشروعات الجادة لتطوير هذه العشوائيات الا انها توضع في الدرج او تزين بها الرفوف وانا بنفسي رايت احد تلك المشروعات من احد الزملاء وقد اعجبني بشدة الفكرة والتي لن تؤثر علي الموجودين بتلك المناطق اثناء تنفيذ المشروع وقد عرض هذا المشروع علي رئيس الجمهورية ولكن لقيمته الشديده فقد قرروا وضعه علي رف فاخر بعيدا عن الأيدي حتي لا يتسخ
احمد باشا ..حمدالله علي السلامة
طيب ياعم الناس ماهي اصيلة اهي وحطوا له الفكرة علي رف فاخر
ايه هيقطعوا نفسهم يعني..احنا نقطع نفسنا ماشي
السلام عليكم تحياتى لك
اية التفائل اللي انتي بتدية للأطفال دة
رئيسة حزب الاحلام:ه
نورتي المدونة
وتحياتك وصلت واسعدتنا وان كنا هنسعد اكتر برأيك المرة الجاية
ابراهيم
طيب والكبار؟؟
اخي الكريم
واناسعيد قوي ان التعليق اسعدك شيئ جيل قوي انك تقدر تسعد حد حتي لو بمجرد تعليق
عايز اقولك حاجة تانية مهمة قوي
القصيدة بتاعة جمال الشاعردي جميلة قوي
واللي يفكر فيها هيلاقيها بتقول كلام كتير قوي في السياسة وعلاقتنا ببعض وعلاقةالحكومة بالشعب ورؤية الشعب لحكامه ولتحرير مقدساته والصراحة اللي احنا عارفينها بس بنهرب منها وحاجات كتير لوهقلك عليها هطول قوي شكرا لجمال وليك
السلام عليكم
هودة اللى حاصل يعنى من يومين ال اية بيعطوا للشباب اراضى عشان تبنيها ولو م تبنتش خلال سنة
يخدوها منة وهو اكيد ماعندوش امكانية البنا لانة فقير ودقة ومواد البنا تكلف كتير والحكومة بتعملها منظر مش اكتر
انتى عارف انا بحضرلسلة مقالات عن مصر الان من واقع الحياة وكلامك ده هيفيدنى كتير
وبعدين انتى بتضرب دايما تحت الحزام
اكثر الله من امثالك
تحياتى
عرفة فاروق السيوطى
مستنيك على مدونتى
Post a Comment